|
Buhay Retirado
Maria Ravelas Sombillo
ni
Bart Ortega
Maria
Ravelas Sombillo, glamorosa at mala-donya ang dating. Masayang kausap
at may kasama pang acting kung nagpapaliwanag. Iyan ang kanyang
larawan sa unang limang (5) minuto ng aming pag-uusap.
Naglingkod siya ng 34 na taon sa Office of the Vice
Chancellor for Administration. Dito sa tanggapang ito siya nag-umpisa
bilang Clerk hanggang sa magretiro noong October 12, 1998 sa gulang
na 65 bilang Administrative Officer II. “Ate Mary” ang karaniwang
tawag sa kaniya ng mga malalapit na kakilala at kaibigan. Para naman
sa ilan, isa siyang mataray na ay masungit pa. Pero ang katotohanan,
ayon kay Vering Flores Mamino, mahigpit lamang siya pagdating sa
trabaho. Ito ang pagtatanggol niya dahil nakasama niya si Ate Mary
ng mahigit dalawampung taon.
Ang kanyang kabataan ay masaya at masagana. Fish cage operator ang
kanyang mga magulang sa Pila, Laguna. Kahit na may elementarya sa
kanilang barangay ay doon pa sa kabayanan siya pinag-aral ng kanyang
mga magulang, Nakapagtapos siya sa University of Santo Tomas sa
kursong AB Philosphy (Journalism). Nagtrabaho siya ng dalawang taon
sa isang Law firm bago nagtrabaho sa UP Los Baños noong 1964.
Subalit nang maungkat ang kanyang buhay-pamilya, luha at lungkot
ang kanyang naging katugunan. Aniya, kung anong luho at kaginhawaan
ang kanyang naging buhay noong kabataan hanggang sa siya’y magdalaga,
kabaligtaran naman ito ng kanyang buhay may-asawa.
May dalawa siyang anak, isang babae at isang lalaki. Ang panganay
na anak niyang babae ay sa Amerika na nakatira, samantalang ang
kanyang bunsong lalaki ay may asawa na rin, subalit malapit man
ang bahay sa lugal ng kanyang tirahan ay malayo naman ang puso nito
sa kaniya. Ang asawa naman ni Ate Mary ay mayroon nang ibang pamilya.
Kung kaya’t tanging isang malaking aso na lamang ang kanyang kasama
sa malaki at magara niyang bahay.
Nasa high school pa lamang ang kanyang panganay ay mag-isa na niyang
binalikat ang pag-aaruga sa kanyang mga anak. Bagaman ang kanyang
asawa noon ay isang overseas contract worker, hindi naman ito nagpapadala
para sa pang araw-araw na gastusin sa pag-aaral ng kanyang mga anak.
Labis na hirap ng katawan, pagod ng isip at sakit ng kalooban ang
kanyang pinagtiisan. Subalit sa halip na manghina sa mga pangyayari,
kinailangang siya’y maging matatag. Ang mga karanasang ito ang nagpatibay
ng kanyang pananampalataya.
Ngayong siya’y retirado na, mabunga at maligaya niyang hinaharap
ang buhay sa katandaan. Araw-araw pa rin siyang umaalis ng bahay,
hindi para maghanap ng pera, kundi para makatulong sa iba. Kung
tutuusin siya pa ang gumagastos. Ito ay dahilan sa abalang-abala
siya sa mga ibat-ibang gawain ng El Shaddai (Laguna Chapter). Marriage
Counselling at Healing ang kanyang ministry sa charismatic movement
na ito. Halos kulang pa ang oras niya para sa ibat-ibang gawain
sa Panginoon. Sa gulang niyang 69 ay malakas at aktibung-aktibo
pa sa mga gawaing espiritwal. Biro pa niya, “kung mas maganda ako
noon, mas maganda ako ngayon.”
Noon, malaking pera rin ang nagagastos niya sa mga iba’t-ibang sakit
na karaniwan na sa mga matatanda. Halos hindi na siya makalakad
noon dahil sa kanyang arthritis, subali’t ayon sa kanya nawala ang
lahat ng ito sa kabutihan ni Yaweh El Shaddai. Ngayong siya’y pinagaling
ng Panginoon ang nalalabi niyang buhay at lakas ay inilalaan na
niya sa paglilingkod. Para kay Ate Mary, ang mga pinagkakaabalahan
niyang mga gawain ay isang prebilihyo na makapaglingkod sa Diyos
at sa tao.
|
.jpg)
